प्रहरीले झापाबाट हतियार तथा दस्तावेजसहित विप्लव नेतृत्वको नेकपाका कार्यकर्तालाई पक्राउ गरेको छ।
सोमबार राति प्रहरीले विर्तामोड नगरपालिका-४ स्थित अनुल सारु मगरको कोठामै कार्यालय बनाएर गतिविधि गरिरहेका विप्लव समूहका झापा जिल्ला इञ्चार्ज र जिल्ला जनसरकार प्रमुखलाई प्रहरीले पक्राउ गरेको हो।
मगरको कोठाबाट कटुवा पेस्तोल २ थान, गोली ४ राउण्ड, आर्थिक सहयोगसम्बन्धी पत्र, परिपत्र, विभिन्न माइन्युट बुक, डायरी, दस्तावेज, सहयोग रसिद, किताब लगायतका विभिन्न सामग्रीसहित तीन जनालाई पक्राउ गरिएको झापा प्रहरीले जनाएको छ।
पक्राउ पर्नेहरूमा विर्तामोड नगरपालिका-४ डेरा गरी बस्ने मकवानपुर भीमफेदी गाउँपालिका-२ का २६ वर्षीय अनुल सारुमगर, विर्तामोड नगरपालिका-४ मेघाबारी चोक बस्ने झापा हल्दिवारी गाउँपालिका-५ का ४४ वर्षीय टिका पोखरेल र इलाम माङसेबुङ गाउँपालिका-१ बस्ने मनिष भन्ने ३४ वर्षीय प्रविन मिश्र रहेका छन्।
प्रहरीका अनुसार पक्राउ परेकामध्ये मिश्र झापा जिल्ला सेक्रेटरी हुन् भने पोखरेल जनसरकार प्रमुख हुन्।
दुवैले मगरको कोठा प्रयोग गरेर झापामा विप्लव नेकपाको समूह विस्तार, चन्दा संकलन, बम विस्फोट र आगजनी गराइरहेका थिए।
गत भदौ २२ गते राति विर्तामोड नगरपालिका-२ चारपानेमा बम विस्फोट भएको घटनाको अनुसन्धान गर्ने क्रममा १ नम्बर प्रदेश प्रहरी कार्यालय विराटनगर, जिल्ला प्रहरी कार्यालय झापा र इलाका प्रहरी कार्यालय अनारमनीबाट प्रहरी खटिएका थिए।
संयुक्त प्रहरी टोलीले संलग्न रहेका टिका पोखरेल र प्रविन मिश्रलाई विर्तामोड नगरपालिका-४ मेघाबारी चोकबाट मे६ प७३०८ नम्बरको मोटरसाइकल, मोबाइल ५ थान, डायरी १ थान, आर्थिक सहयोग सम्बन्धी पत्र ७ थान, विभिन्न परिपत्र २ पाना र टिकाराम पोखरेलको नाममा रहेको लाइसेन्ससहित फेला पारी पक्राउ गरेको हो।
दुई जना पक्राउपछि थप अनुसन्धान गर्ने क्रममा अनुल सारुमगरको कोठा खानतलासी गर्दा कोठामा लुकाइछिपाइ राखेको उक्त हतियार लगायतका विभिन्न सामग्री फेला परेको झापाका प्रहरी उपरीक्षक दिनेश मैनालीले बताए।
उनका अनुसार झापामा उनीहरूले बम विस्फोटका घटना गराएका थिए। भदौ २२ गते साढे ८ बजे र साढे १२ बजे झापाका दुई स्थानमा बम विस्फोट गराइएको थियो।
चारपाने चोकउत्तर निर्माणाधीन सहारा बचत तथा ऋण सहकारी संस्था र गौरादह नगरपालिकाका प्रशासकीय अधिकृत इन्द्रबहादुरको घर तथा गाडीमा विस्फोट गराइएको थियो।
दुवै ठाउँमा प्रेसर कुकर बम विस्फोट गराइएको प्रहरीले जनाएको छ।
प्रहरीले पक्राउ परेकालाई मुलुकी अपराध संहिता २०७४ को हातहतियार खरखजना, विष्फोटक पदार्थ, राज्यविरूद्धको कसूर, चन्दा, संगठित अपराधमा अनुसन्धान थालेको छ।
प्रहरी उपरीक्षक मैनालीका अनुसार उनीहरूले झापाका विभिन्न व्यक्तिलाई धम्की दिई चन्दा उठाउने गरेका थिए।
झापाकै अर्जुनधारा, दमकलगायत स्थानमा रहेका एनसेलको टावरमा विस्फोट र आगजनी कार्यमा पनि उनीहरूको संलग्नता रहेको प्रहरीको भनाइ छ।
‘चाडवाडको मुखमा बम विस्फोट गराएर जनता आतंकित पार्ने योजना रहेको बुझ्नमा आएको छ,’ मैनालीले भने।
झापा प्रहरीले यसअघि ताप्लेजुङ जिल्लाको जिल्ला सेक्रेटरी (सचिव) नरपति पौडेल, मेची-ब्यूरो गणेश कार्की (ढोली), ताप्लेजुङ जिल्ला कमिटी सदस्य यामबहादुर लिम्बू, पाँचथर जिल्ला जिल्ला इन्चार्ज राजु दास र ताप्लेजुङ जिल्लाको जिल्ला इन्चार्ज सागर लिम्बूलाई पक्राउ गरेको थियो।
उनीहरूलाई राज्यविरूद्धको अपराध र संगठित अपराध मुद्दा चलाइएको छ।
