देशका ठाउँ-ठाउँमा अहिले डेंगी रोगको संक्रमणको रूपमा फैलिरहेको छ।
रोगकै कारण जनता त्रसित छन् भने सरकारले यसलाई नियन्त्रणका लागि परेको बताउँदै आएको छ।
गण्डकी प्रदेशमा करिब १३ सयको हराहारीमा डेंगी संक्रमित भएका छन्।
यसरी डेंगी रोग फैलिँदै गर्दा यसको नियन्त्रणमा खटिएका कर्मचारीहरूले भने लपारबाही गरेको गुनासो गण्डकी प्रदेशका मुख्यमन्त्री पृथ्वीसुब्बा गुरुङ समक्ष गरेका छन्।
गण्डकी प्रदेश सरकारले सञ्चालन गरेको हेलो मुख्यमन्त्री कार्यक्रममा पोखराका गोविन्द रिजालले गुनासो गर्दै दिनदिनै फैलिरहेको रोग नियन्त्रणका लागि आएको अनुगमन टोलीले ड्रमको पानी खन्याएको तर न्यूनीकरण र बच्ने उपायबारे केही सल्लाह सुझाव नै नदिएको बताए।
‘तपाईंको घरमा लामखुट्टेको लार्भा भेटियो भन्दै पानी खन्याए’ उनले भने,‘तर न्यूनीकरण र यसबाट बच्ने उपायको बारेमा केही नभनी गए।’ पोखरा महानगरपालिकाको वडा न. १७ घारीपाटनमा खटिएको टोलीले गत शनिबार यस्तो व्यवहार गरेको रिजालको भनाइ थियो।
उनले प्रदेशले रोग नियन्त्रणका लागि छुट्याएको बजेट प्रभावकारी कार्यान्वयन नभएको भन्दै मुख्यमन्त्रीको ध्यानाकर्षण समेत गराए।
जवाफमा मुख्यमन्त्री गुरुङले डेंगी रोगविरूद्ध प्रदेश सरकार गम्भीर रहेको बताए।
उनले सम्बन्धित मन्त्री र सचिवलाई डेंगी विरूद्धको काम थप प्रभावकारी बनाउन २ दिनअघि मात्र निर्देशन दिएको जानकारी गराउँदै पोखरामा उपत्यका थप कार्यक्रम आउने बताए।
पोखराका प्रत्येक टोल विकास संस्था र विभिन्न आमा समूह तथा क्लबलाई पनि डेंगीविरूद्ध परिचालन गर्ने योजनामा प्रदेश सरकार रहेको बताए।
प्रदेश सरकारले यसअघि नै डेंगी नियन्त्रणका लागि भन्दै २१ लाख रुपैयाँ प्रदेश स्वास्थ्य निर्देशालयलाई उपलब्ध गराइसकेको छ।
सोही अनुसार हाल मनाङ, मुस्ताङ र कास्की बाहेकको जिल्ला टोली परिचालन गरिएको छ।
कास्कीमा भने निर्देशानलयले माइकिङ गर्ने र वडा वडामा टोली खटाएर ‘खोज र नष्ट गर’ अभियान चलाइरहेको बताएको छ। तर डेंगी रोगबाट संक्रमण हुनेको सख्या घट्नुको सट्टा बढ्न थालेपछि यसको प्रभावकारितामाथि प्रश्न उठिरहेको छ।
