राजश्व अनुसन्धान विभागले नक्कली भ्याट बिल र आयकर छली प्रकरणमा पाँच वटा फर्म र त्यसका सञ्चालकविरूद्ध काठमाडौं जिल्ला अदालतमा मुद्दा दायर गरेको छ।
९ करोड ३९ लाख ३३ हजार ११० रुपैयाँ बिगो, बिगोको दोब्बर जरिवाना र जनही तीन वर्ष कैद माग गर्दै राजधानीका ती फर्म र सञ्चालकविरूद्ध विभागले बुधबार अदालतमा मुद्दा दायर गरेको हो।
यसरी मुद्दा दायर गरिएकामा एसपी इन्टरप्राइजेज, हिमाल कन्स्ट्रक्सन प्रालि र त्यसका सञ्चालक शिवप्रसाद गौतम, वाटरमार्क इन्टरप्राइजेज र प्रोप्राइटर शिवराम न्यौपाने, न्यू हिमालयन इन्टरप्राइजेज र प्रोप्राइटर लक्ष्मण चौलागाईं, न्यू युनिभर्सल इन्टरप्राइजेज र प्रोप्राइटर सुदर्शन चौलागाईं, आर्जन हार्डवेयर सप्लायर्स र सञ्चालक देवबहादुर खत्री छन्।
विभागका अनुसार काठमाडौं ३२ स्थित एसपी इन्टरप्राइजेजले वस्तु तथा सेवा खरिद नै नगरी झुठा र नक्कली कर बिजक मात्र खरिद गरेको अनुसन्धानमा देखिएको छ। सो इन्टरप्राइजेजलाई एक करोड ९ लाख ७० हजार ५३८ रुपैयाँ बिगो र आयकर २ करोड ७१ लाख ५९ हजार ११५ छलेको अभियोगमा मुद्दा दायर गरिएको छ।
यस्तै, काठमाडौं ३२ को वाटरमार्क इन्टरप्राइजेजले नक्कली भ्याटबिलमा ४८ लाख १७ हजार ९९२ र आयकर एक करोड ११ लाख ७६ हजार ५२५ छलेको अभियोगमा मुद्दा दायर गरिएको छ।
काठमाडौं ११ को न्यू हिमालयन इन्टरप्राइजेजलाई नक्कली भ्याट बिलमा २१ लाख २४ हजार ७०१ र आयकर छलीमा ४८ लाख १४ हजार ९९९ रुपैयाँ दावीसहित मुद्दा दायर गरिएको छ।
न्यू युनिभर्सल इन्टरप्राइजेज मध्यपुर ठिमी ९ लाई ११ लाख २ हजार ३७६ रुपैयाँ नक्कली भ्याट र आयकर १९ लाख २९ हजार ७५० रुपैयाँ छलेको अभियोग विभागले लगाएको छ।
काठमाडौं ४ को आर्जन हार्डवेयरले १ करोड ८५ लाख ६७ हजार ८१० रुपैयाँ नक्कली भ्याटबिल र एक करोड १२ लाख ६९ हजार ३१४ रुपैयाँ आयकर छलेको अभियोगमा मुद्दा दायर गरिएको छ।
विभागले पछिल्लो समय नक्कली भ्याट बिल र आयकर छलीमा कारबाही तीब्र पारिरहेको छ।