अमेरिकाको क्यालिफोर्नियास्थित फ्रेस्नोमा आक्रमणकारीले अन्धाधुन्ध गोली हान्दा ४ जनाको मृत्यु भएको छ।
आइतबार स्थानीय समय अनुसार साँझ ६ बजे फुटबल हेर्नको लागि एक घरपछाडि परिवार र उनीहरूका साथीभाइ भेला भएका थिए। सोही समयमा आक्रमणकारीले भीडमा अन्धाधुन्ध गोली हाने। गोली लागेर चार जनाको मृत्यु भएको प्रहरीले जनाएको छ।
उक्त आक्रमणमा ३ जनाको घटनास्थलमै मृत्यु भएको र एक जनाको भने उपचारको क्रममा अस्पतालमा मृत्यु भएको जनाइएको छ।
अन्य छ जनाको अस्पतालमा उपचार भइरहेको छ।
लगभग ३५ जना सहभागी भएका उक्त भेलामा २५ देखि ३५ वर्ष उमेर समूहका एसियाली नागरिक रहेका प्रहरीलाई उद्धृत गर्दै एपीले जनाएको छ।
प्रहरीले आक्रमणकारीलाई पक्राउ गरी थप अनुसन्धान थालेको छ। पीडित परिवारले भने आक्रमणकारीलाई नचिनेको बताए।