स्वीडेनका अभियोजनकर्ताहरूले विकिलिक्सका संस्थापक जुलिअन असान्जमाथि सन् २०१० मा लागेको एउटा बलात्कारको आरोपबारेको अनुसन्धानलाई खारेज गरेका छन्।
असान्जले उक्त आरोपको खण्डन गर्दै सहमतिमै यौनसम्बन्ध राखेको बताउँदै आएका थिए।
सन् २०१२ मा लण्डनस्थित इक्वेडरको दूतावासमा शरण लिएपछि उनी सात वर्षसम्म स्वीडेनमा सुपुर्दगी हुनबाट बचेका थिए।
४८ वर्षिय अस्ट्रेलियाली नागरिक असान्ज गत मे महिनामा उक्त दूतावासबाट निष्काशित भएका थिए।
हाल उनी लण्डनस्थित एक कारागारमा राखिएको छन्।
'सार्वजनिक अभियोजनकर्ता निकायकी उप-निर्देशक इभा म्यारी पर्ससनले जुलिआन असान्जको सम्बन्धमा अनुसन्धान बन्द गर्ने फैसला गरेकी छन्', स्वीडिस अभियोजन प्राधिकरणले आफ्नो वक्तव्यमा भनेको छ।
उनले सो बारेमा न्यायिक पुनरावलोकन भने हुनसक्ने बताइन्।
उक्त घटनासँग सम्बन्धित सातजना साक्षीहरूसँग बयान लिइएपछि यस्तो निर्णय गरिएको थियो।
उनीमाथि सन् २०१० मा स्टकहोममा भएको विकिलिक्स सम्मेलनपश्चात् दुई महिलालाई बलात्कार तथा यौन दुर्व्यवहार गरेको आरोप लागेको थियो।
स्वीडेनमा उनीविरुद्ध यौन दुर्व्यवहार तथा गैरकानुनी दबावका मुद्दा रहेपनि सन् २०१५ मा समयसीमा सकिएको भन्दै ती फिर्ता भएका थिए।
अभियोजनकर्ताहरूले बलात्कार आरोपसम्बन्धी मुद्दा चाहिँ त्यसको कानुनी समयसीमा सन् २०२० को अगस्ट अगावै पुन: सुरु गर्ने कि नगर्नेबारे विचार गरिरहेका थिए।
(बिबिसी)
