हत्यामा संलग्न रही फरार भएका दुई जनालाई प्रहरीले पक्राउ गरेको छ।
नुवाकोट तारकेश्वर गाउँपालिका-५ का १५ वर्षीय लैलु लामाको हत्यामा संलग्न भएको अभियोगमा प्रहरीले तारकेश्वर गाउँपालिका-५ का सन्तबहादुर तामाङ र काठमाडौं नागार्जुन नगरपालिका-२ का केशव लामालाई पक्राउ गरेको हो।
प्रहरीको केन्द्रीय अनुसन्धान ब्युरोले उनीहरूलाई शनिबार पक्राउ गरेको हो।
सन्तबहादुर शनिबार साँझ ५ बजे काठमाडौं नागार्जुन-२ नाम्गेल चोकबाट र केशवलाई काठमाडौं-१७ ढल्कुबाट पक्राउ गरिएको ब्युरोले जनाएको छ।
लैलु लामाको २०६१ वैशाख १६ गते हत्या भएको थियो। राति फ्याङबो तामाङको घरमा गएका बेला सन्ताबहादुरसमेतले उनलाई कुटपिट गरी हत्या गरेका थिए।
टोलमा युवा समूहबीचको झगडाका क्रममा लैलुलाई कुटपिट गरी हत्या गरिएको थियो। आरोपीलाई आवश्यक कारबाहीको लागि जिल्ला प्रहरी कार्यालय नुवाकोटमा जिम्मा लगाइएको छ।