पाकिस्तान प्रशासित कश्मीरमा तीन दिनदेखि आइरहेको हिमपहिरो र पहिरोमा परी कम्तीमा ६२ जनाको मृत्यु भएको छ।
बिबिसीका अनुसार पहिरोको प्रभाव सबैभन्दा बढी नीलम उपत्यकामा परेको छ।
पाकिस्तानी अधिकारीहरूका अनुसार नीलम उपत्यकामा मात्र कम्तीमा ५९ जनाको मृत्यु भएको छ भने ४० भन्दा बढी घाइते छन्। सयभन्दा बढी घर क्षति भएका छन्। हिमाल-पहाडले घेरिएको नीलम उपत्यकाको साँघुरो बाटो अवरूद्ध भएकाले उद्धार टोली जान सकेको छैन।
पहिरोमा परी धेरै जना हराइरहेका पनि छन्।
कश्मिरको यो क्षेत्रमा प्राकृतिक प्रकोप धेरै हुन्छ। यही प्रकोपका कारण पाकिस्तानका अरू क्षेत्रसहित भारत र अफगानिस्तानमा पनि दर्जनौंको मृत्यु भइसकेको छ।
तर पाकिस्तानी कश्मीरमा सबभन्दा बढी प्रभाव परेको पाकिस्तानको प्रकोप व्यवस्थापन प्राधिकरणले जनाएको छ।
अधिकांश क्षेत्रमा मंगलबार मौसममा सुधार आए पनि धेरै प्रभावित क्षेत्रहरूमा अझै पनि सम्पर्क हुन सकिरहेको छैन।
पाकिस्तानको बालोचिस्तान प्रदेशमा २० जनाको मृत्यु भएको अधिकारीहरूले बताएका छन्। मृत्यु हुनेमध्ये १२ महिला र सात केटाकेटी छन्।
त्यस्तै भारत प्रशासित जम्मु-कश्मीरमा पनि आठ जनाको मृत्यु भएको स्थानीय सञ्चारमाध्यमले जनाएका छन्।
अफगानिस्तानमा पछिल्लो दुई सातामा २४ जनाको मृत्यु भइसकेको र ४० भन्दा बढी घाइते भएका अधिकारीहरूले बताएका छन्। पछिल्ला तीन दिनमा सबभन्दा बढी मृत्यु भएको पनि बताइएको छ। त्यहाँ धेरै असर परेका क्षेत्र हेलमान्ड, खन्डहर, हेरत र काबुल हुन्।