सन् २०१८ मा सुरू भएको 'मीटू' अभियानमा केही बलिउड कलाकारमाथि यौन दुर्व्यवहारको आरोप लागेको थियो।
आरोपीमध्ये एक संगीतकार अनु मलिक पनि थिए। सोना महापात्रा, श्वेता पंडित, नेहा भसीन, केरालिसा मोन्टेरियो र डेनिका डिसूजाले अनुबाट आफूहरूमाथि यौन शोषण भएको आरोप लगाएका थिए।
यी आरोप भारतको राष्ट्रिय महिला आयोगले जाँचबुझ गरिरहेको थियो। हाल आएर आयोगले अनुका विरूद्ध पर्याप्त प्रमाण नपाइएको भन्दै मुद्दा बन्द गरिदिएको छ।
भारतीय सञ्चारमाध्यम दैनिका भास्करका अनुसार आयोगकी बरनाली शोमले सोनी पिक्चर्स नेटवर्क्स इन्डिया प्रालिकी माधुरी मल्होत्रालाई पत्र पठाएकी छन्। पत्रमा आरोपी अनु मलिकमाथि लागेको मुद्दा बन्द गरिदिएको उल्लेख छ।
आयोगले सोना मोहापात्रासँग आरोप सम्बन्धमा कागजात र दस्तावेजहरू मागेको थियो। तर सोनाले आयोगलाई उपलब्ध गराउन सकिनन्।महिला आयोगकी बरनाली शोमले सोनालाई पनि यसबारे पत्र पठाएको दैनिक भास्करले लेखेको छ।
सोनालाई पत्रमा भनिएको छ 'आयोगले यो मामिलामा ६ डिसेम्बर २०१९ मा तपाईंको प्रतिक्रिया पाएको छ। उपरोक्त कुरामा मध्यनजर गर्दै तपाईंको मुद्दामा प्रमाण नपुगेका कारण बन्द गरिएको जानकारी गराउन मलाई भनिएको छ।'
राष्ट्रिय महिला आयोगकी प्रमुख रेखा शर्माले पनि आयोगले उजुरीकर्ताको मागमा 'एक्शन' लिएर उनीसँग सम्पर्क गरेको हो।
उनका अनुसार उजुरीकर्ता (सोना)ले 'अहिले आफू बाहिर भएको र फर्किएपछि भेट्ने' बताइन्। 'हामीले करिब ४५ दिन पर्खियौं। केही कागजात पनि मागेका थियौं। तर उहाँको तर्फबाट कुनै जवाफ आएन,' आयोग प्रमुख रेखाका भनाइ उद्धृत गर्दै दैनिक भास्करले लेखेको छ।
सोनाबाहेक अनु मलिकविरूद्ध उजुरी दिने अन्य व्यक्तिले पनि आयोगसँग सम्पर्क नगरेको उनले बताइन्।
तर यो मुद्दा सधैंका लागि बन्द भएको होइन। उजुरीकर्ताले आयोगसँग सम्पर्क गरे वा धेरै बलिया प्रमाण वा कागजात संकलन भए, मुद्दा पुनः खोलिने पनि उनले जानकारी दिइन्।
अनु मलिकमाथि यो आरोप लागेपछि सन् २०१८ को इन्डियन आइडलबाट उनी निकालिएका थिए। सन् २०१९ मा पुनः आएका उनलाई चौतर्फी विवादपछि सोनीले निकालेको थियो।
अनुले भने आफूविरूद्धको आरोप गलत भन्दै आएका छन्। यसबारे कुनै पुष्टि भइसकेको छैन।