आइसिसी क्रिकेट विश्वकप २०१९ अन्तर्गत भारत र पाकिस्तानबीचको बहुप्रतिक्षित खेल आइतबार दिउँसो सवा तीन बजे सुरू हुँदैछ। तर केही दिन पहिलेदेखि नै यो खेलबारे टेलिभिजनको स्टुडियोदेखि बजार, क्याफे, होटल र क्रिकेट एकेडेमीमा विश्लेषण भइरहेका छन्।
खेल हेर्न दुबै देशका कतिपय स्थानको सडक खाली हुनेछन्। चिया नास्ता अझ बेलुकाको खाना पहिले नै तयार हुनेछन्।
भारत र पाकिस्तानबीचको खेल विश्वको जुनसुकै कुनामा भए पनि सधैं यस्तै हुन्छ। अझ विश्वकपको खेल हुँदा त नहुने कुरै भएन।
इंग्ल्यान्डको म्यानचेस्टरमा हुने भारत र पाकिस्तानबीचको खेल हेर्न ५ लाखले टिकट खरिद गर्न चाहेका थिए। तर जम्मा २५ हजारले मात्र पाए।
दुबै टिमका कप्तान तथा खेलाडी खेललाई लिएर दबाब नभएको प्रतिक्रिया दिन्छन्। तर दुबै टिमका खेलाडी एकअर्काविरूद्ध खेल्दा तीव्र दबाबमा हुन्छन्।
‘पराजित भएपछि कप्तान र प्रशिक्षकले राजीनामा दिन दबाब कति आउँछ?’, इंग्ल्यान्डलाई पराजित गरेपछि पाकिस्तानका कप्तान सर्फराज अहमदलाई प्रश्न गरिएको थियो।
उनको जवाफ थियो, ‘कसलाई जवाफ दिनु। हामी खराब खेल्छौं भने हामीले सब कुरा सहनु पर्छ। यो हाम्रो टिम र हाम्रा खेलाडी हुन्। टिमलाई समर्थन प्राप्त हुन्छ भनेमात्र अघि बढ्न सक्छौं।’
पाकिस्तानले भारतसँग एक प्रकारले र भारत बाहेककासँगअर्कै प्रकारले खेल्ने गरिएको विषयमा पनि कप्तान अहमदलाई प्रश्न गरिएको थियो-कस्तो मनस्थितिले गर्दा भारतसँग सम्पूर्ण शक्ति खर्च गरेर खेल्न नसकिएको हो?
उनले यसको ठ्याक्कै उत्तर थाहा नभएको जवाफ दिए। यति भने, ‘नयाँ खेलाडीले थेरै दबाबमा खेल्ने गरेको महसुस हुन्छ।’
केही खेलाडी दबाबमा हुँदा टिमलाई असर हुने उनको भनाइ छ।
पाकिस्तानको ब्याटिङ, बलिङ र फिल्डिङ राम्रो हुन सकिरहेको छैन। यसअघि जेजस्तो भए पनि पाकिस्तान यसपटक भारतविरुद्धको खेल जसरी पनि जित्न चाहन्छ। कप्तान अहमद पनि सबैको इच्छा भारतलाई हराउने भएको बताउँछन्।
भारतविरुद्ध जित्ने दबाव पाकिस्तानलाई भए जस्तै पाकिस्तानलाई हराउने दबाव भारतमाथि पनि छ।
दबावका बीच दुवै टिमका खेलाडी एकअर्का विरुद्ध सानदार प्रदर्शन गरेर आफुलाई हिरो सावित गर्न चाहन्छन्। भारतका कप्तान विराट कोहलीले राम्रो खेल्ने टिमले जित हात पार्ने बताउँछन्।
‘टिममा पूरा विश्वास छ। जसले राम्रो खेल्छ उसले जित्ने हो। प्रतिद्वन्द्वी टिमको बलियो र कमजोर पक्ष थाहा पाएपछि पनि खराब खेल्छौं भने जित्ने अवसर कम हुन्छ,’ खेलअघि कोहलीले भनेका छन्, ‘११ खेलाडी नै एकसाथ केन्द्रित भएर खेल्ने हो भने जस्तोसुकै टिमलाई हराउन सक्छौं।’
भारतले यसअघि दक्षिण अफ्रिकालाई ६ विकेट र डिफेन्डिङ च्याम्पियन अस्ट्रेलियालाई ३६ रनले पराजित गरेको थियो। न्युजिल्यान्डविरुद्धको तेस्रो खेल भने वर्षाका कारण रद्द भएको थियो। सुरुआती २ खेलमा जित हात पारेपछि कप्तान कोहलीले भारत विश्वकपका जुनसुकै टिमलाई हराउन सक्षम रहेको दाबी गरिरहेका छन्।
पाकिस्तानविरुद्धको खेलमा भारतले नयाँ ओपनिङ ब्याट्सम्यान मैदान उतार्दैछ। यसअघि अस्ट्रेलियाविरुद्धको खेलमा शतक प्रहार गरेका ओपनर शिखर धवन घाइते भएका थिए। जसकारण उनले विश्वकपका केहि खेल गुमाउँदैछन्। ओपनर शिखर धवन नहुँदा टिममा असर नगर्ने कोहलीको दाबी छ। शिखरको स्थानमा केएल राहुलले खेल्ने विश्वास गरिएको छ। राहुलले रोहित शर्मासँग मिलेर ओपनिङ गर्नेछन्। यसअघि राहुलले चौथो नम्बरमा ब्याटिङ गरेका थिए।
मौसम साफा रहेको रहेर ५० ओभर खेल भएको अवस्थामा कप्तान कोहलीले चौथो नम्बरमा विजय शंकरलाई उतार्नेछन्। शंकर बलिङ पनि गर्न सक्छन्। वर्षाले खेल प्रभावित हुने अवस्थामा भारतले स्पिनर कुलदिव यादवको स्थानमा तीव्र गतिका मोहमद सामीलाई खेलाउन सक्छ। अर्कोतर्फ विजय शंकरको स्थानमा दिनेश कार्तिकले स्थान बनाउन सक्छन्।
भारतले टसमा जोड दिएको छैन। किनकी भारतले जारी विश्वकपमा बलिङ र ब्याटिङ दुबैमा राम्रो गरिरहेको छ। रोहित शर्मा तथा कप्तान कोहली राम्रो फर्ममा छन्। यस्तै अलराउन्डर हार्दिक पाण्ड्या र महेन्द्रसिंह धोनी पनि राम्रो खेलिरहेका छन्।
इंग्ल्यान्डविरुद्धको जस्तै प्रदर्शन गरेमा पाकिस्तानले भारतलाई विश्वकपमा हराउने ४४ वर्षसम्म अधुरो रहेको सपना पूरा गर्न सक्छ। तर यसका लागि पाकिस्तानको ‘टप अर्डर’ चल्नु पर्छ। इमाम उल हक, फखर जमान, बाबर अजाम, मोहमद हफिज र सर्फराज अहमदले राम्रो ब्याटिङ गर्नु पर्ने देखिन्छ।
मौसमले खेल असर गर्ने देखिएको हुँद तीव्र गतिका बलर मोमहद आमिर र वाहब रियाजलाई सुरुआतमा ल्याउनुको विकल्प छैन। आमिर र वाहबलाई हसन अलीले पनि साथ दिन सक्छन्। स्पिनर मोहमद हफिजका लागि कसिलो बलिङ गर्नुको विकल्प छैन।
आइतबार हुने खेल भारतका लागि भन्दा पाकिस्तानका लागि दबाबपूर्ण छ। किनकी सेमिफाइनल पुग्नका लागि पाकिस्तानलाई जितको आवश्यकता छ। भारतविरुद्धको हारले पाकिस्तान अप्ठेरो अवस्थामा पुग्न सक्छ।
