आइसिसी टी-२० विश्वकप एसिया छनोट प्रतियोगिताका लागि नेपाली टिमले अन्तिम तयारी गरिरहेको छ।
सिंगापुरमा आगामी साउन ६ देखि हुने विश्वकप छनोटअघि नेपालले मलेसियामा १० दिने तयारी गरिरहेको छ। अभ्यासका दौरान नेपालले मलेसियासँग टी-२० अन्तर्राष्ट्रिय सिरिज पनि खेलेको थियो। सिरिज २-० ले नेपालले आफ्नो पक्षमा पारेको छ।
नेपालबाट बिदाइ हुँदा कप्तान पारस खड्काले विश्वकप छनोटमा कुनै टिमलाई कमजोर नआँक्ने बताएका थिए। अर्को चरणमा पुग्न सबै खेल जित्नुको विकल्प नभएको पनि खड्काको भनाइ छ।
एसिसी यू-१९ इस्टन रिजन प्रतियोगिता खेल्न मलेसियामा रहेका पवन सर्राफ र रोहितकुमार पौडेलले उतैबाट टिममा समावेश भएका छन्र।
नेपाली टिम मलेसियाबाट साउन ४ गते सिंगापुर प्रस्थान गर्नेछ।
सिंगापुरमा नेपालले पहिलो खेल कतारसँग साउन ७ गते, मलेसियामा साउन ८ गते, कुवेतसँग साउन ११ गते र सिंगापुरसँग साउन १२ गते खेल्नेछ।
यो प्रतियोगितामा च्याम्पियन भएमा नेपाल विश्व छनोटमा पुग्नेछ। विश्व छनोट आगामी अक्टोबरमा युएईमा हुँदैछ।
टी–२० विश्वकप छनोटमा जिम्बावेसहित १४ टिमबीच विश्वकप छनोटमा प्रतिस्पर्धा हुनेछ। १४ टिम मध्ये शीर्ष ६ टिम आगामी वर्ष अस्ट्रेलियामा हुने आइसिसी टी-२० विश्वकपमा छानिनेछन्।
नेपाली टिम
पारस खड्का (कप्तान), अभिनास बोहरा, बसन्त रेग्मी, विनोद भण्डारी, दीपेन्द्रसिंह ऐरी, ज्ञानेन्द्र मल्ल, करण केसी, ललितनारायण राजवंशी, पवन सर्राफ, प्रदीप ऐरी, रोहितकुमार पौडेल, सन्दीप लामिछाने, शरद भेषावकर, सोमपाल कामी
सपोर्ट स्टाफ
उमेश पटवाल- प्रमुख प्रशिक्षक
रमन सिवाकोटी- व्यवस्थापक/विश्लेषक
दिनेश भट्ट- फिजियो
सबै तस्बिरहरू : रमन सिवाकोटी