काठमाडौं जिल्ला क्रिकेट संघको अध्यक्षमा अमितविर पाण्डे सर्वसम्मत निर्वाचित भएका छन्। मंगलबार भएको विशेष साधारणसभाले पाण्डेको अध्यक्षतामा १४ सदस्यीय कार्यसमिति चयन गरेको छ।
संघको उपाध्यक्षमा विजयकुमार शर्मा, सचिवमा बसन्तराज सत्याल र कोषाध्यक्षमा युग बस्नेत चयन भएका छन्। सदस्यमा मनिष डंगोल, अजयविर पाण्डे, रमन श्रेष्ठ, सामसनजंग थापा, प्रफुल्ल बैद्य, रितेश डंगोल, महेश्वरी डंगोल, धिरेन्द्र श्रेष्ठ र विजितध्वज चन्द निर्वाचित भएका छन्।
योसँगै क्यानमा आबद्ध सबै ३९ वटा जिल्लाकै निर्वाचन सम्पन्न भएका छन्।
अब अन्तर्राष्ट्रिय क्रिकेट काउन्सिल (आइसिसी) बाट २०७३ वैशाखमा निलम्बनमा परेको नेपाल क्रिकेट संघ (क्यान) ले असोज पहिलो साताभित्र नयाँ नेतृत्व पाउने बाटो खुलेको छ।
आइसिसीले गठन गरेको स्वतन्त्र समितिले क्यानको १७ सदस्यीय केन्द्रीय कार्यसमितिको निर्वाचनका लागि २ वटा मिति प्रस्ताव गरेको छ।
समितिले भदौ २८ र २९ वा असोज ४ र ५ मा निर्वाचन गराउन आइसिसीसँग प्रस्ताव गरेको छ।
अब प्रादेशिक क्रिकेट संघको निर्वाचन अगष्टभित्र सकिने छ। हाल क्यानको तीन वटा प्रादेशिक संघको निर्वाचन सकिएको छ। सुदूरपश्चिम प्रदेशमा हरि रेग्मी, गण्डकी प्रदेशमा देवेन्द्र प्रजु र प्रदेश १ मा मिङ्ग्मा डण्डु शेर्पा निर्वाचित भइसकेका छन्।
अब प्रदेश २, ३ र ५ को निर्वाचन अगष्टभित्र सम्पन्न हुनेछ।
कर्णाली प्रदेशमा एउटा जिल्ला (सुर्खेत) मा मात्र क्रिकेट संघ छ। त्यसैले कर्णालीलाई प्रदेश ५ मा गाभेर निर्वाचन गरिनेछ।
आइसिसीको बोर्ड बैठक आगामी अक्टोबर १३ मा बस्दैछ।
सो बैठकमा क्यानमाथिको निलम्बन फुकुवाको प्रस्ताव पेश हुने विश्वास गरिएको छ। निलम्बन फुकुवाको प्रस्ताव पेश गर्न क्यानको निर्वाचित केन्द्रीय समितिले आइसिसीलाई अनुरोध गर्नु पर्नेछ।