आइसिसी क्रिकेट विश्वकप लिग-२ अन्तर्गत पहिलो त्रिकोणीय सिरिजमा स्कटल्यान्ड र ओमानले समान ३-३ खेलमा जित हात पारेको छ। सिरिजको अर्को टिम पपुवा न्युगिनी (पिएनजी) भने चारै खेलमा पराजित भएको छ।
स्कटल्यान्डमा भएको सिरिजमा तीन वटै टिम एकआपसमा २-२ पटक भिडेका थिए। जसमा स्कटल्यान्ड र ओमानले एकअर्काविरुद्ध १-१ खेल गुमाए।
बुधबार भएको अन्तिम खेलमा ओमानले पिएनजीलाई ४ विकेटले पराजित गर्यो।
पहिले ब्याटिङ गरेको पिएनजीले ९ विकेटको क्षतिमा २०६ रन जोड्यो। ओमानले ६ विकेटको क्षतिमा १४ बल खेल्न बाँकी छदा लक्ष्य भेट्टायो।
सिरिजको समाप्तीसँगै स्कटल्यान्ड र ओमानले ४ खेलमा समान ६-६ अंक जोडेका छन्। तर रनरेटमा स्कटल्यान्ड अघि छ। पिएनजी अंकबिहीन छ।
चार वर्षपछि भारतमा हुने एकदिवसीय विश्वकपको छनोटको रुपमा रहेको क्रिकेट विश्वकप लिग–२ सुरु भएको हो।
लिग-२ मा नेपालसहित ७ देशबीच त्रिकोणीय सिरिज हुनेछ। ७ वटा एकदिवसीय टिमबीच २१ वटा त्रिकोणीय सिरिज सार्वजनिक हुने आइसिसीले यसअघि नै गरेको थियो।
लिग–२ मा नेपालसहित नामिबिया, ओमान, पपुवा न्युगिनी (पिएनजी), स्कटल्यान्ड, युएई र अमेरिका छन्।
एक सिरिजमा ६ एकदिवसीय खेल हुनेछन् भने एक टिमले चार खेल खेल्नेछ। प्रत्येक टिमले साढे २ वर्षको बीचमा ३६ वटा खेल खेल्नेछन्।
नेपालले पहिलो सिरिज घरेलु मैदानमा खेल्नेछ। कीर्तिपुरस्थित टियु मैदानमा हुने सिरिजमा नेपाल, अमेरिका र ओमानबीच खेल हुनेछ। सो सिरिज आगामी फेब्रुअरीमा हुनेछ।
