नेपाली राष्ट्रिय क्रिकेट टिमका पूर्व प्रशिक्षक पुबुदु दसानायके पाँच वर्षपछि नेपाल आउने भएका छन्।
पुबुदु एभरेस्ट प्रिमियर लिग (इपिएल) टी-२० क्रिकेट प्रतियोगिताको २०२० सिजनका लागि भैरहवा ग्लाडिएटर्सको प्रशिक्षक बन्दै नेपाल आउने भएका हुन्।
शरद भेषवाकारको कप्तानीमा रहेको भैरहवाले आगामी फागुन १७ देखि चैत १ गतेसम्म हुने प्रतियोगितामा पुबुदुलाईप्रशिक्षकको रुपमा नियुक्त गरेको जनाएको हो।
पुबुदु सन् २०१५ मा नेपाली राष्ट्रिय क्रिकेट टिमको प्रशिक्षण छाडेपछि पहिलो पटक नेपाल आउन लागेका हुन्।
इपिएलले सन् २०२० को सिजनका लागि पुबुदु आउनु सुखद खबर भएको जनाएको छ।
पुबुदु सन् २०११ नेपाली राष्ट्रिय क्रिकेट टिमको प्रशिक्षक नियुक्त भएका थिए। त्यसअघि उनले क्यानडालाई २०११ को एकदिवसीय विश्वकप खेलाएका थिए।
पुबुदु नेपाल आएपछि नेपाली क्रिकेटले एकपछि अर्को सफलता हात पारेको थियो।
उनको प्रशिक्षणमा नेपालले डिभिजन ४ र ३ को उपाधि जितेर डिभिजन २ सम्मको यात्रा गरेको थियो। यसैगरी उनले नेपाललाई सन् २०१४ को टी-२० विश्वकपमा छनोट गराएका थिए। त्यतिबेला नेपालले विश्वकपमा अफगानिस्तान र हङकङलाई पराजित गरेको थियो। लगत्तै नेपालले टी-२० टिमको मान्यता पाएको थियो।
खेलाडीलाई खुलेर खेल्न दिने र प्रतिभा पहिचान गर्न सक्ने खुबी भएका पुबुदुमाथि खेलाडीको साथ लिएर नेपाल क्रिकेट संघका पदाधिकारीलाई मुद्दा हाल्न लगाएको आरोप समेत लागेको थियो।
पुबुदुसँग भैरहवाले एक सिजनका लागि मात्र सम्झौता गरेको बताएको छ।
पुबुदु यसअघि अमेरिकाको प्रशिक्षक नियुक्त भएका थिए। केहि महिनाअघि राजीनामा दिएका उनी हाल कुनै टिमको प्रशिक्षक छैनन्।
‘भैरहवा ग्लाडिएर्टसमा आबद्ध भएपछि उत्साहित भएको छु। नेपाल मेरा लागि सधै मुटुमा छ। मलाई अवसर दिएर फेरि नेपाली क्रिकेटको सेवा गर्ने मौका दिएकोमा धन्यवाद दिन चाहन्छु,’ पुबुदुले भनेका छन्।
भैरहवाका टिम मालिक आदित्य साङ्घाइले पुबुदुलाई प्रशिक्षकको रुपमा पाउनु टिमको मात्र नभइ समग्र नेपाली क्रिकेटका लागि खुसीको कुरा भएको बताए।
कप्तान भेषवाकरले यसअघि दुई पटक उपविजेता बनेको भैरहवा पुबुदुको आगमनसँगै च्याम्पियन बन्ने उत्साह मिलेको बताए।
यसपटकको इपिएलमा एक टिममा एक अन्तर्राष्ट्रिय खेलाडी आइकोनिक खेलाडीको रुपमा हुने बताइएको छ। आइकोनिक खेलाडी टेस्ट राष्ट्रका हुने आयोजकको दाबी छ।
इपिएलमा काठमाडौं किंग्स इलेभेन, ललितपुर पाट्रिओट्स, विराटनगर वारियर्स, भैरहवा ग्लाडिएटर,पोखरा राइनोज र चितवन टाइगर्स प्रतिस्पर्धा गर्नेछन्। गत सिजन ललितपुर च्याम्पियन बनेको थियो।
