नेपाली राष्ट्रिय क्रिकेट टिमका युवा लेगस्पिनर सन्दीप लामिछानेले सिजन २०१९–२० का लागि अस्ट्रेलियाको बिग ब्यास लिग (बीबीएल) टिम मेलवर्न स्टार्सले रिटेन गर्ने भएको छ।
मेलवर्न स्टार्सका प्रशिक्षक डेभिड हसीले सन्दीपलाई सिजनभर खेलाउन चाहेको प्रतिक्रिया दिएका छन् भने सन्दीपका सहयोगी रमन सिवाकोटीले बीबीएलमा सम्झौता हुने प्रक्रिया अन्तिम चरणमा पुगेको बताएका छन्।
सन्दीपले गत सिजनको बीबीएलमा ७ खेलमा ११ विकेट लिएका थिए। बीबीएलको सुरु र अन्त्यमा मात्र खेलेको सन्दीप बीचमा बंगलादेश प्रिमियर लिग (बीपीएल) खेल्न गएका थिए।
'हामी विस्तृत कुरा टुंगोमा पुर्याइरहेका छौ। व्यक्तिगत रुपमा उनलाई पूरा सिजन मेलवर्नमा चाहान्छु। तर म उनलाई बंगलादेश जान रोक्दिन। किनकी उनले त्यहाँ गएर बढी पैसा कमाउछन्,' हसीलाई उधृत गर्दै द सिड्नी मर्निङ हेराल्डले लेखेको छ।
'उनी गत सिजनमा उत्कृष्ट लयमा थिए। उनले अहिले खेल सुधार गरेका छन्। उनी टिममा हुँदा फाइदा हुन्छ। उनले सुरु, मध्य र अन्तिम ओभरमा बलिङ गर्न सक्छन्।'
हसीले सन्दीप बंगलादेश जाने बताइरहदा बंगलादेश क्रिकेट बोर्डले सिजनमा बीपीएल आयोजना नगर्ने जनाएको छ। बीपीएलका फ्रेन्चाइज टिमहरुसँग असमझदारी भएपछि बोर्डले बीपीएलको सट्टा अर्कै टी–२० लिग गर्ने जनाएको हो।
सन्दीपले गत सिजन बीपीएलमा सिल्हेट सिक्सरबाट खेल्दै ६ खेलमा ४ विकेट लिन सफल भएका थिए।
यता आगामी सिजनको अफगानिस्तान प्रिमियर लिग (एपीएल) पनि नहुने भएको छ। व्यवसायीक साझेदारले अफगानिस्तान क्रिकेट बोर्डलाई सम्झौता रकम दिन नसकेपछि एपीएल नहुने भएको हो।
जसका कारण सन्दीपका लगि एपीएल खेल्ने ढोका समेत बन्द भएको छ। सन्दीपलाई गत सिजन नगरहर लिओपार्डसले १५ हजार अमेरिकी डलरमा आबद्ध गरेको थियो। एपिएलमा एक खेल खेलेका सन्दीपले दुई विकेट लिएका थिए।
जससँगै सन्दीपलाई यो सिजन आराम मिल्ने भएको छ।
सिजनमा सन्दीपले ग्लोबल टी-२० क्यानडा खेलिसकेका छन्। हाल क्यारेबियन प्रिमियर लिग (सिपिएल) खेलिरहेका सन्दीपको इन्डियन प्रिमियर लिग (आइपिएल) टिम दिल्ली क्यापिटल्ससँग एक वर्षको सम्झौता बाँकी छ।
गत सिजन सन्दीपले पाकिस्तान सुपर लिग र टी-१० लिग खेलेका थिए। दुवै लिगका लागि ड्राफ्ट घोषणा हुन बाँकी नै छ।