पोखरा प्रिमियर लिग (पिपिएल) टी–२० क्रिकेट प्रतियोगितामा घरेलु टिम पोखरा पल्टनले विजयी सुरुवात गरेको छ।
पोखराले आइतबार पोखरा रंगशालामा भएको खेलमा काठमाडौं गोल्डेन्स वारियन्सलाई ९ विकेटले पराजित गरेको हो।
काठमाडौंले दिएको ११९ रनको लक्ष्य पोखराले १ विकेटको क्षतिमा १४.१ ओभरमै पूरा गर्यो।
पोखराका लागि ओपनर कुशल भुर्तेलले नटआउट ६५ रन जोडे। उनले ४३ बलमा ४ चौका र ५ छक्का प्रहार गरे।
यस्तै रविइन्दर सिंहले नटआउट ३८ रनको योगदान दिए। उनले ३२ बलमा ५ चौका र १ छक्का हिर्काए। त्यसअघि आसिफ शेख १४ रनमा आउट भए।
टस हारेर पहिले ब्याटिङ गरेको काठमाडौंले २० ओभरमा ८ विकेटको क्षतिमा ११८ रन जोड्यो।
काठमाडौंका लागि सुवोध भाटीले नटआउट ४५ रन जोडे। उनले २९ बलमा ४ चौका र ४ छक्का हिर्काए। गौरव तोमारले १३ रन जोड्दा अन्य ब्याट्सम्यान सस्तैमा आउट भए।
बलिङमा पोखराका रासिद खान, ललितनारायण राजवंशी र कुशल मल्लले २–२ विकेट लिए।
