अवे गोलका कारण च्याम्पियन्स लिगबाट बाहिरिएपछि पेरिस सेन्ट जर्मेनका स्टार नेइमारले म्याचेस्टर युनाइटेडसँगको खेलमा आफ्नो टोली विरूद्ध दिइएको पेनाल्टीको निर्णय अपमानजनक भएको प्रतिक्रिया दिएका छन्।
बुधबार राति सम्पन्न खेलमा २-१ को अवस्थामा रहेको नतिजा ९४ मिनेटमा प्राप्त पेनाल्टीबाट अर्कै मोडमा पुगेपछि उनले यस्तो प्रतिक्रिया दिएका हुन्।
उनले इन्स्टाग्राममा यसबारेमा असन्तुष्टि पोखेका छन्।
'पछाडी लागेको बल कसरी ह्यान्ड बल हुन्छ?' उनले सो पोस्टमा सोधेका छन्।
'यो अपमान हो। उनीहरूले चार जना त्यस्ता मान्छेलाई भिएआरमा राखे जसलाई फुटबल खेलको बारेमा केहि पनि थाहा छैन', उनले पोस्टमा निर्णयप्रति प्रश्न उठाउँदै लेखेका छन्।
नेइमार हाल चोटका कारण मैदान बाहिर रहँदै आएका छन्।
च्याम्पियन्स लिगको दोश्रो लेगको अन्तिम १६ अन्तरगतको प्रतिष्पर्धामा म्यान्चेस्टर युनाइटेडले फ्रेन्च क्लब पेरिस सेन्ट जर्मेन पिएसजी लाई अवे मैदानमा ३-१ ले पराजित गरेको छ।
युनाइटेडको जीतका लागि मार्कस र्यासफर्डले इन्जुरी समयमा पाएको पेनाल्टी मार्फत गरेको गोलले सो जित सम्भव भएको हो। संमग्रमा ३-३ को बराबरी भए पनि अवे गोलका कारण युनाइटेड क्वाटरफाइनलमा प्रवेश गरेको छ।
युनाइटेडले सो गोल भिऐआरमार्फत भएको थियो। खेलको ९४ औं मिनेटमा डिओगो दालोटले प्रहार गरेको बलले पिएसजीका प्रेसनेल किमपेम्बेको हातमा लागेपछि युनाइटेडले पेनाल्टी पाएको थियो।