दोस्रो संस्करणको चन्द्रागिरी गोल्डकप फुटबल प्रतियोगिता आइतबारदेखि सुरू भएको छ।
आयोजक दीपशिखा युवा समूहको आयोजनामा सुरू भएको ए डिभिजन फुटबल प्रतियोगिताको काठमाडौं निर्वाचन नम्बर ९ का प्रतिनिधि सभा सांसद कृष्ण गोपाल श्रेष्ठले उद्घाटन गरेका हुन्।
उद्घाटन खेलमा त्रिभुवन आर्मी क्लबलाई १-० ले हराउँदै जावलाखेल युथ क्लब विजयी भएको हो।
जावलाखेल युथ क्लबका जर्सी नम्बर १७ का खेलाडी दानिल बिजीले खेलको ४ मिनेटमा गोल गरे। उक्त गोल जावलाखेल युथ क्लबका लागि निर्णायक बन्यो ।
यस्तै, जावलाखेल युथ क्लबका जर्सी नम्बर १६ का खेलाडी विशाल तामाङले म्यान अफ दि म्याचको उपाधि पाए। भोलि फ्रेन्डस् क्लब र एपीएफ विच प्रतियोगिता हुनेछ ।
काठमाडौंको नैकापस्थित नैकाप खेल मैदानमा हुने प्रतियोगितामा २ विभागीय र एक आयोजकसहित ८ टोलीले प्रतिस्पर्धा गर्ने छन् ।
प्रतियोगितामा विभागीय त्रिभुवन आर्मी क्लब र एपिएफसँगै जावलाखेल युथ क्लब, आयोजक दीपशिखा युवा समूह, सरस्वती युथ क्लब, फ्रेन्डस् क्लब, वीरगन्ज युनाइटेड र च्यासल युथ क्लबको सहभागिता रहेको छ ।
प्रतियोगिताको विजेताले ६ लाख तथा उपविजेताले ३ लाख रुपैयाँ प्राप्त गर्ने छ । प्रतियोगिताको उत्कृष्ट खेलाडी र सर्वाधिक गोलकर्ताले समान ३० हजार रुपैयाँ पाउनेछन् । यस्तै हरेक खेलको म्यान अफ द म्याचले ५ हजार रुपैयाँ प्राप्त गर्नेछन् ।
प्रतियोगिता वैशाख २२ गतेसम्म सञ्चालन हुनेछ।