बार्सिलोनाका स्ट्राइकर लुइस स्वारेजले लिभरपुलविरूद्धको खेलमा गोल उत्सव नमनाउने घोषणा गरेका छन्।
उनले मंगलबार हुने च्याम्पियन्स लिगको सेमिफाइनलको दोश्रो लेगमा एनफिल्डमा हुने खेलमा आफूले लिभरपुल विरूद्ध गोल गरेपनि खुशीयाली नमनाउने घोषणा गरेका हुन्।
उनी लिभरपुलका पूर्व सदस्य हुन्। उनले झन्डै साढे तीन वर्ष लिभरपुलका लागि खेलेका थिए। सन् २०१४ मा उनले लिभरपुल छाडेका हुन्।
बार्सिलोनाले पहिलो लेगमा ३-० ले जितेको खेलमा उनले गोल गरेपछि खुशीयाली मनाएका थिए जसका लागि उनले पछि माफी मागेका थिए।
उनले लिभरपुलका फ्यानहरूको सम्मान गर्ने भएकाले यस्तो निर्णय गरेको बताए।
‘मैले त्यहाँ रहँदा गरेको कामका बारेमा त्यहाँका मानिसहरूलाई थाहा छ’, स्वारेजले भने, ‘त्यहाँ सिठ्ठी भन्दा पनि करकल ध्वनीको आवाज धेरै सुन्नेछु। त्यहाँ केहि मान्छे खुशी पनि हुनेछन् तर त्योभन्दा बढि खुशी र कृतज्ञ मानिसहरू हुनेछन्।’
उनले गत साता आफूले मनाएको गोलको उत्सव जस्तो यसपाली गोल गरेमा नमनाउने उनले स्पष्ट पारे।
‘निश्चित रूपमा मैले गोल गरे भने, त्यही तरिकाले मैले गोलको खुशी मनाउने छैन’, उनले भने।
उनले लिभरपुलको कप्तानीसमेत सम्हालेका थिए।
