फिफा सन् २०२२ बाट विश्वकपको अन्तिम स्पर्धामा ४८ टोलीलाई सहभागी गराउने योजनाबाट तत्कालका लागि पछि हटेको छ।
गत वर्ष फिफाका अध्यक्ष जियानी इन्फान्टिनोले विश्वकपमा सहभागी टिमको संख्या ३२ बाट बढाउने योजना सन् २०२६ भन्दा पहिले नै अर्थात २०२२ बाट नै सुरू गर्न सकिने बताएका थिए।
यदि सहभागी टिमको संख्या बढाएको भए कतारले खाडीका अन्य देशसँग मिलेर विश्वकप आयोजना गर्नुपर्ने हुनसक्थ्यो। फिफाले व्यापक अध्ययन र परामर्शबाट सहभागी टिमको संख्या आउँदो विश्वकपबाट नै बढाउन नसकिने भएको जनाएको छ।
अध्ययनको क्रममा कतार एक्लैले ४८ टिमसहितको विश्वकप आयोजना गर्न सक्ने-नसक्नेबारेमा अध्ययन गरिएको भएपनि समय कम भएकाले तत्कालका लागि सो योजनालाई स्थगित गरेको फिफाले जनाएको छ।
त्यसैगरी कतारी विश्वकप आयोजकहरूले योजना अनुसार हुनसक्ने भएको भए ४८ टोली सम्मिलित विश्वकप गर्ने पाउँदा कतारको लागि राम्रो हुनेथियो भनेर जनाएका छन्।