कप्तान सर्जियो रामोशले चीनमा खेल्ने प्रस्ताव आएपनि आफ्नो करियर रियल मड्रिडबाटै सिध्याउन चाहेको बताएका छन्।
बुधबार रियलका अध्यक्ष फ्लोरेन्टिनो पेरेजले भने स्पेनी डिफेण्डरले चिनयाँ लिगमा जान 'फ्रि ट्रान्सफर' मागेको बताएका थिए।
'सत्य हो मलाई चीनबाट प्रस्ताव आएको छ। म यस बारेमा झुट बोल्दिन', ३३ वर्षिय रामोशले भने, 'मेरो सपना यहीबाट अवकाश लिने हो।'
उनी सन् २००५ देखि रियलमा रहँदै आएका छन्। उनको सम्झौता सन् २०२१ मा सकिनेछ।
यसैगरी पेरेजले आफूलाई रामोशका एजेन्टले चीनबाट धेरै राम्रो प्रस्ताव आएको तर त्यो क्लबले किन्न भने नसक्ने भनेको बताएका थिए।
'मैले रामोशलाई आफ्नो क्याप्टेनलाई सित्तैमा छोड्न रियलका लागि सम्भव नभएको बताएको थिएँ', पेरेजले भने।
'मैले चीन जाने बारेमा कुनै पनि पल सोचेको छैन', रामोशको भनाइ छ।
'सबै कुरा स्पष्ट पार्न म हिजो अध्यक्षलाई भेट्न गएको थिएँ', रामोशले भने।
१४ वर्षमा रामोशले रियललाई २० उपाधि जित्न सघाएका छन्। यसमा ४ च्याम्पियन्स लिग तथा चार ला लिगा उपाधि रहेका छन्।