कोपा अमेरिकाका लागि तयारी गरिरहेको ब्राजिल फुटबल क्लब प्रतियोगिता सुरू नहुँदै संकटमा परेको छ।
आशलाग्दा स्टार खेलाडी नेयमार युनियर कोपा अमेरिका कप सुरु नहुँदै घाइते भएपछि ब्राजिल फुटबल क्लबलाई संकट आइलागेको हो।
नेयमारले आगामी जुलाई १५ देखि सुरु हुने कोपा अमेरिकाका सबै खेल गुमाउनेछन्। बुधबार राति भएको कतारसँगको मैत्रीपूर्ण खेलमा नेयमार घाइते भएर खेलको १७ मिनेटमै मैदानबाट बाहिरिएका थिए। यो खेलमा ब्राजिलले कतारलाई २–० ले हराएको थियो।
क्लबका अनुसार नेयमारको दाहिने खुट्टाको जोर्नीमा गम्भीर चोट लागेको छ। यसकारण नेयमार कोपा अमेरिकाको खेलमा फर्कन सक्ने छैनन्।
‘चोटको गम्भीरताका कारण नेयमारलाई खेलमा फर्किने शारीरिक परिस्थिति छैन, खेलमा पुनरागमनका लागि समय लाग्नेछ,’ क्लबले उल्लेख गरेको छ।
नेयमार घाइते भएपछि ब्राजिलको राष्ट्रिय टोलीको प्राविधिक समितिले उनको प्रतिस्थापन खेलाडी चयन गर्ने प्रक्रिया थालेको छ।
पेरिस सेन्ट जर्मन क्लबबाट खेलिरहेका २७ वर्षीय नेयमार घाइते भएपछि यसले ब्राजिलको कोपा अमेरिका यात्रामा धक्का लाग्ने अनुमान गरिएको छ।
प्रशिक्षक टिटेले नेयमार नहुँदा टिमले भावनात्मक रुपमा कमजोर महसुस गर्ने बताए। तर, क्लबका लागि नेयमारजस्तै प्रदर्शन गर्ने खेलाडीहरू रहेको उनले जनाए।
म्यानचेस्टर सिटीबाट खेलिरहेका अर्का स्टार गाब्रियल जेसुस र बार्सिलोनाका स्टार फिलिप कौटिन्हो, लिभरपुलका रोबर्टो फिर्मिनोजस्ता खेलाडी ब्राजिलसँग छन्।