फिफा बरियतामा एक नम्बरमा रहेको बेल्जियमका फरवार्ड इडेन हाजार्ड स्पेनिस क्लब रियल मड्रिडमा अनुबन्ध हुने भएका छन्।
रियल र हाजार्डबीच एक सय मिलियन युरोमा सहमति भइसकेको एजेन्सीहरूले जनाएका छन्। चेल्सीबाट उत्कृष्ट प्रदर्शन गरिरहेका हाजार्डलाई खेलाडी अभावमा गुज्रिरहेको रियलले क्लबमा भित्र्याउन लामो समयदेखि प्रयास गरिरहेको थियो।
हाजार्ड आफैंले पनि केही समययता आफू मड्रिड जान इच्छुक रहेको अभिव्यक्ति दिइरहेका थिए।
यसै सिजनमा हाजार्डको मद्दतले चेल्सीले युरोपा च्याम्पियन्स लिग उपाधि जितेको थियो। मे ३० मा भएको फाइनल खेलमा आर्सनलविरुद्ध हाजार्डले व्यक्तिगत १ र पेनाल्टीमा १ गोल गरेका थिए। आर्सनल चेल्सीसँग ४–० ले हारेको थियो।
युरोपा उपाधि रक्षासँगै चेल्सी अर्को सिजनको युरोपा च्याम्पियन्स लिगमा स्वतः छनोट भइसकेको छ।
‘मलाई लाग्छ युरोपा लिग जितेपछि म चेल्सीमा रहन्नँ,’ युरोपा लिगको उपाधिका लागि चेल्सीबाट अन्तिम खेल खेल्दै हाजार्डले भनेका थिए, ‘म अर्को सिजनमा सम्भवतः रियलमा हुने छु।’
२८ वर्षीय हाजार्ड चेल्सीबाट सात वर्षयता खेलिरहेका थिए। उनी क्लबमा हुँदा चेल्सीले दुई पटक प्रिमियर लिग, दुईपल्टै युरोपा लिग र एक पटक एफए कपको उपाधि जितेको थियो।
चेल्सी फुटबल क्लबका प्रबन्धक माउरिओ सारी भन्छन्, ‘आर्सनलविरुद्ध खेलेपछि हाजार्डले क्लब छोड्ने बताइरहेका थिए, चेल्सीमा हाजार्ड एक अद्भुत खेलाडी थिए, उनको निर्णयलाई म सम्मान गर्छु।’
पोर्जुगिज स्टार क्रिस्टियानो रोनाल्डोले रियल छोडेसँगै उक्त क्लबले सिजनका खेलमा उत्कृष्ट लय समात्न सकेको छैन।
चेल्सीमा १० नम्बर जर्सीमा खेल्ने गरेका हाजार्ड रियलमा गएपछि भने उनको जर्सी नम्बर कति हुने भन्ने अन्योल छ।
रियलमा १० नम्बर जर्सीबाट क्रोएसियाका फरवार्ड लुका मोड्रिच खेलिरहेका छन्। रोनाल्डोको ७ नम्बर जर्सीमा स्पेनका मारिएनो डिएजले खेलिरहेका छन्। रियलले खेल्ने अर्को सिजनमा हाजार्ड १० नम्बर जर्सीमै देखिने आँकलन सञ्चारमाध्यमहरूले गरे पनि यसबारे रियलले आधिकारिक रुपमा उल्लेख गरिसकेको छैन।
