एएफसी कपमा नेपालको लिग च्याम्पियन मनाङ मर्स्याङ्दी क्लब लगातार पाँचौ खेलमा जीतविहीन बनेपछि समूह चरणबाटै बाहिरिएको छ। बुधबार बंगलादेशको ढाकामा भएको पाँचौ खेलमा मनाङलाई अबहानी ढाकाले ५–० गोलले पराजित गर्यो।
खराब खेल पस्किएको मनाङविरुद्ध ढाकाका मोहमद नबीब नेवाज जिवानले ११ मिनेटमा पहिलो गोल गरे। पहिलो हाफमा १ गोल खाएको मनाङले दोस्रो हाफमा ४ गोल खायो। ढाकाका लागि केर्भेन्स बेरफोर्डले ४७ मिनेटमा दोस्रो गोल गरे भने ६३ मिनेटमा जेवान रानाले अर्को गोल थपे।
ढाका यतिमै रोकिएन। सनडे चिजोबा एनजाडिएलुले ७५ मिनेट र मुनिमुल इस्लामले दोस्रो हाफको इन्जुरी टाइमको पाँचौ मिनेटमा पाँचौ गोल गरे।
समूह ‘ई’ मा मनाङ ५ खेलबाट २ अंक जोडेर पुछारमा छ। समूहको शीर्ष टिममात्र अन्तर क्षेत्रीय सेमिफाइनलको प्लेअफमा पुग्ने भएको हुँदा मनाङ अन्तिम खेलअघि बाहिरिएको हो।
समूहमा ढाका १० अंक जोडेर शीर्ष स्थानमा छ। भारतको चेन्नइयीन ८ अंक जोडेर दोस्रो स्थानमा छ। तेस्रो स्थानको पन्जावको ५ अंक छ। पञ्जावले ५ खेलमै बराबरी खेलेको थियो।
यसै सिजनबाट एएफसी कपमा डेब्यू गरेको मनाङलाई एन्फा कम्प्लेक्स सातदोबाटोमा भएको पहिलो खेलमा बंगलादेशको लिग च्याम्पियन ढाका अबहानीले १-० गोलले पराजित गरेको थियो। दोस्रो खेलमा मनाङलाई गत सिजनको भारतीय सुपर लिग च्याम्पियन चेन्नइयीनले २-० गोलले हराएको थियो।
भारतको भुनवेश्वरमा भएको तेस्रो खेलमा मनाङले पञ्जावसँग २-२ को बराबरी खेलेर एएफसी कपमा पहिलो अंक र पहिलो गोल गर्न सफल भएको थियो। चौंथो चरणको खेलमा मनाङ र पञ्जावबीच सातदोबाटोमा प्रतिस्पर्धा भयो। खेल १-१ को बराबरीमा सकिएको थियो।
मनाङले अन्तिम चरणको खेल असार ११ गते चेन्नइयीन एन्फा कम्प्लेक्स सातदोबाटोमा खेल्नेछ।