अखिल नेपाल फुटबल संघ (एन्फा) ले मोफसलमा हुने फुटबल प्रतियोगितालाई व्यवस्थित गर्न २८ बुँदे ‘मोफसल फुटबल प्रतियोगिता नियमन नियमावली-२०७६’ जारी गरेको छ।
एन्फाले प्रतियोगितालाई व्यवस्थित बनाउन प्रतियोगिता स्थल, खेल मैदान, सुरक्षा, टिमको स्थान लगायतका विषयमा नियमन गर्न लागेको हो।
‘क’ वर्गको प्रतियोगितामा कम्तिमा १० वटा टिमको सहभागिता हुनु पर्नेछ। जसमा ६ वटा ए डिभिजन क्लल हुनु पर्नेछ। जसमा पछिल्लो लिगअनुसार शीर्ष ६ मा परेको बाट ४ वटा, ७ देखि १०औं स्थानमा रहेको १ वटा र ११ देखि १४ स्थानबाट १ क्लब हुनु पर्नेछ। सम्भाव भए विदेशी क्लब हुनु पर्नेछ भने आयोजक, मोफसल र प्रदेश टिमलाई समावेश गर्नु पर्नेछ।
‘ख’वर्गको प्रतियोगितका लागि कम्तिमा १० वटा हुनु पर्नेछ भने ६ वटा ए डिभिजन क्लब समावेश गर्नु पर्नेछ। जसमा शीर्ष ६ का २ क्लब, ७ देखि १० स्थानका २ र ११ देखि १४ स्थानका २ क्लब हुनु पर्नेछ। सम्भव भए १ विदेशी, आयोजक र प्रदेश टिम हुनु पर्नेछ।
'ग' वर्गको प्रतियोगिताका लागि ८ टिमको सभागिता हुनु पर्नेछ। जसमा ४ वटा ए डिभिजन क्लबलाई समावेश गर्नु पर्नेछ। जसमा लिगको शीर्ष ६ का १ क्लब, ७ देखि १० मध्येबाट २ क्लब र ११ देखि १४ मध्येबाट १ क्लब हुनु पर्नेछ। आयोजक र प्रदेश टिमलाई पनि स्थान दिन सकिनेछ।
प्रतियोगिताका लागि रेफ्री, सहायक रेफ्री, रेफ्री एसेसर र म्यान कमिस्नार एन्फाले खटाएको हुनु पर्ने भने सेवा एन्फाले तोके बमोजिम हुनु पर्नेछ।
प्रतियोगिता संचालन गर्न १ महिनाअघि नै स्वीकृति लिनुका साथै एन्फामा दर्ता भएका खेलाडीले मात्र प्रतियोगितामा भाग लिन पाउनेछन्।
‘क’ वर्गको प्रतियोगिताका २० हजार, ‘ख’ वर्गका लागि १५ हजार र ‘ग’ वर्गका लागि १० हजार रुपैयाँ दर्ता शूल्क लाग्नेछ।
सुरक्षा, डाक्टर, एम्बुलेन्स, व्यवस्थित चेन्जिङ रुप र प्लेयर बक्स हुनु पर्नेछ। खेलाडी र अफिसियलको बीमा अनिवार्य रुपमा गर्नु पर्नेछ।
क वर्गको प्रतियोगिताको पुरस्कार राशी १० लाख, ख वर्गको ८ लाख र ग वर्गको ६ लाख रुपैयाँ पुरस्कार राशी हुनु पर्नेछ।
कुनै एक क्लब एक महिनामा तीन भन्दा बढी प्रतियोगितामा सहभागी हुन पाउने छैन।
विदेशी खेलाडीका लागि श्रम स्वीकृति, कार्य सहमति र भिसाका लागि सिफारिस सम्बन्धि मापदण्ड पालना गर्नु पर्ने एन्फाले जनाएको छ।