सोमबार राति भएको समूह 'बी' अन्तरगतको खेलमा पोर्चुगललाई पराजित गर्दै युक्रेन युरोकप-२०२०का लागि छनौट भएको छ।
युक्रेनले पोर्चुगललाई २-१ गोलले पराजित गरेको हो। खेलमा पहिलो अग्रता युक्रेनले लिएको थियो।
घरेलु मैदानमा भएको खेलमा यारिम्चुकले छैटौं मिनेटमा गोल गर्दै टोलीलाई अग्रता दिलाएका थिए। यसैगरी युक्रेनले दोश्रो गोल खेलको २७ औं मिनेटमा गरेको थियो। उसका लागि सो गोल यार्मोलिन्कोले गरे।
यसरी पहिलो हाफमा २-० ले पछि परेको साविकको युरोकप विजेता पोर्चुगलले आफ्ना स्टार स्ट्राइकर क्रिश्चियानो रोनाल्डोको गोलमा खेलको ७२ औं मिनेटमा खेलमा फर्किने प्रयास गर्यो। उनले सो गोल पेनाल्टीबाट गरेका हुन्।
यस गोलसँगै रोनाल्डोले आफ्नो करियरको ७ सय गोल पूरा गरे। उनले यो गोल संख्या आफ्नो क्लब र देशका लागि खेलेर पुर्याएका हुन्।
रोनाल्डोले पेनाल्टीमार्फत गोलमा अन्तर घटाएपनि पोर्चुगलले त्यसपछि थप गोल गर्न सकेन र पराजित भयो।