युरोकप-२०२०को छनौट चरणको आफ्नो अन्तिम खेलमा इटालीले अर्मेनियामाथि विशाल गोल अन्तरको विजय हासिल गरेको छ।
सोमबार राती भएको समूह 'जे' अन्तरगतको खेलमा इटालीले अर्मेनियालाई ९-१ को विशाल गोलअन्तरले हराएको हो।
अर्मेनियालाई ९-१ ले पराजित गर्ने क्रममा इटालीले खेलको ८ औं मिनेटमा चिरो इमोबिलको गोलमा अग्रता लिएको थियो।
त्यसपछि पूर्णतया एकपक्षिय बनेको खेलमा इटालीले खेलको ९, २९, ३३,६४, ७२,७५,७७ तथा ८१ औं मिनेटमा गोल गर्यो।
यसक्रममा चिरो इमोबिलले र निकोलो जानिओलोले दुई–दुई गोल गरे। इमोबिलले ८ र ३३ औँ मिनेटमा गोल गरे भने जानिओलोले ९ र ६४ औँ मिनेटमा।
यसैगरी बाँकी गोलहरू भने क्रमशः निकोलो बारेला, एलेसिुओ रोमाग्नोली, जर्जिनिओ, रिकार्दो ओर्सोलिनी र फेडेरिको केइसाले गरेका थिए। यसमध्ये जर्जिनिओले पेनाल्टीमार्फत गोल गरेका हुन्।
यस्तै अर्मेनियाले फर्काएको एकमात्र गोल ७९ औं मिनेटमा एड्गर बाबायनले गरेका हुन्।
इटालीको यो कुनै पनि टोलीविरूद्धको सर्वाधिक ठूलो जित मध्येको एक हो। उसले सन् १९४८ मा अमेरिकालाई ९-० ले हराएको थियो।
