लिग च्याम्पियन मनाङ मर्स्याङ्दी क्लबले मिडफिल्डर जगजित श्रेष्ठलाई आबद्ध गरेको छ। मनाङले उनीसँग साढे तीन महिनाको सम्झौता गरेको हो।
'हामीले आपसी सहमतीमा सम्झौता गरेका छौ। उनले ए डिभिजन लिग अवधिभर मनाङबाट खेल्नेछन्,' मनाङका महासचिव अनिल गुरुङले सेतोपाटीसँग भने।
राष्ट्रिय टिमका पूर्व मिडफिल्डर श्रेष्ठ हाल अस्ट्रेलियामा छन्। त्यहाँ उनले क्षेत्रीय क्लबबाट खेलिरहेका छन्।
पछिल्लो समय राष्ट्रिय टिमका लागि प्रशिक्षणमा आएका उनी अन्तिम टिममा भने पर्न असफल भएका थिए।
मनाङले लिगका लागि अञ्जन विष्ट र रञ्जन विष्टसँग पनि सम्झौता गरिसकेको छ। यस्तै सुजर विक पनि मनाङमै छन्।
गत सिजन खेलेका विराज महर्जन र गोलकिपर विशाल श्रेष्ठ भने क्लब छाडेका छन्। क्लबले डिफेन्डर आदित्य चौधरीलाई यसअघि नै भित्र्याइसकेको छ भने गोलकिपरद्वय दिप कार्की र अशोक बरालले नयाँ सिजनका लागि सम्झौता गरेका छन्।
महासचिव गुरुङले अफ्रिकी मूलका ४-५ खेलाडीसँग सम्झौता गर्ने तयारी भइरहेको जानकारी दिए। 'हामी केहि दिनमै ट्र्याल गरेर ४-५ जना विदेशी खेलाडी आबद्ध गर्दैछौं,' उनले भने।
सिजनको सहिद स्मारक 'ए' डिभिजन लिग आगामी मंसिर २८ गते देखि गर्ने अखिल नेपाल फुटबल संघ (एन्फा) ले यसअघि नै घोषणा गरेको थियो।