म्यानचेस्टर युनाइटेड बराबरीमा रोकिएको छ।
आइतबार राती इङ्लिश प्रिमियर लिग अन्तरगत भएको खेलमा म्यानचेस्टर शेफिल्ड युनाइटेडसँग ३-३ को बराबरीमा रोकिएको हो।
खेलमा पहिलो अग्रता शेफिल्डले १९ औं मिनेटमा लिएको थियो। उसले फ्लेकको गोलमा अग्रता लिएको थियो।
पहिलो हाफमा १-० ले पछि परेको म्यानचेस्टर युनाइटेडलाई मोएसेटले खेलको ५२ औं मिनेटमा गोल गरे र २-० ले पछि पारे।
त्यसपछि खेलको ७२ औं मिनेटमा म्यानचेस्टर लयमा फर्कियो। उसले ७२, ७७ र ७९ औं मिनेटमा लगातार ३ गोल गर्दै २-० को नतिजालाई ३-२ ले आफ्नो पक्षमा ल्यायो।
उसका लागि ती गोलहरू क्रमशः विलियम्स, ग्रीनवुड तथा मार्कश राशफर्डले गरेका थिए।
यसरी ८ मिनेटमा लगातार गोल गरेर खेलमा फर्किएको म्यानचेस्टर युनाइटेडले ९० औं मिनेटमा शेफिल्डबाट गोल खायो र बराबरीमा चित्त बुझाउन बाध्य भयो। टोलीका लागि सो बराबरी गोल म्याकबुर्नीले गरेका हुन्।
यस नतिजापछि जारी लीगमा १३ खेलबाट १७ अंक जोडेको म्यानचेस्टर युनाइटेड अंकतालिकाको ९ औं स्थानमा छ भने १८ अंकसहित शेफिल्ड छैटौं स्थानमा छ।
