इर्लिङ ब्राउट हल्यान्डले जर्मन बुन्डेस लिगाको डेब्यू खेलमा ह्याट्रिक गरेका छन्। नर्वेका १९ वर्षीय हल्यान्ड शनिबार राति बोरुसिया डर्टमुन्डबाट खेलेर बुन्डेस लिगमा डेब्यू गरेका हुन्।
गत महिना १७.१ मिलियन पाउन्डमा अस्ट्रियन क्लब साल्जवर्गबाट डर्टमुन्डमा आबद्ध भएका हल्यान्डले शनिबार एफसी अग्सवर्गविरुद्धको खेलमा दोस्रो हाफमा मैदान छिरेर ह्याट्रिक गरेका हुन्।
दोस्रो हाफको ५६ मिनेटमा मैदान छिरेका उनले २३ मिनेट भित्र ह्याट्रिक पूरा गरे। उनी मैदान छिर्दा डर्टमुन्ड ३-१ ले पछि परेको स्थिति थियो।
उखेले खेलको ५९ मिनेटमा व्यक्तिगत पहिलो गोल गरे। ७० मिनेटमा दोस्रो गोल गरेका उनले ७९ मिनेटमा ह्याट्रिक पूरा गरे। हल्यान्डको ह्याट्रकसँगै डर्टमुन्डले खेल ५–३ ले जित्यो। हल्यान्ड छिरेपछि डर्टमुन्डका लागि सान्चोले ६१ मिनेटमा गोल गरेका थिए।
सिजनको सुरुमा अस्ट्रियन क्लब साल्जवर्गका लागि खेल्दा उनले च्याम्पियन्स लिगमा पनि ह्याट्रिक गरेका थिए। उनले साल्जवर्गका लागि २२ खेलबाट २८ गोल गरेका थिए। जसमा पाँच ह्याट्रिक समावेश छन्।
'मलाई बहुत आराम लागेको थियो। किन त्यस्तो भयो थाहा छैन,' उनले खेलपछि भने,'म एकदमै राम्रो क्लब र राम्रा खेलाडीसँगै छु। मसँग राम्रा मानिस साथमा छन्। म गोल गर्न आएको हुँ। डेब्यूमा गोल गर्दा राम्रो भयो।'
हल्यान्डलाई भित्र्याउन इटालियन क्लब युभेन्ट्स र इंग्लिस क्लब म्यानचेस्टर युनाइटेडले पनि चासो देखाएका थिए। किनकी उनले यस सिजनको च्याम्पियन्स लिगको समूह चरणमा ८ गोल गरेका थिए। जुन गोल समूह चरणको व्यक्तिगत दोस्रो बढी हो।
