नेपाली राष्ट्रिय टिमका मिडफिल्डर रोहित चन्दले इन्डोनेसियाको माथिल्लो डिभिजनको क्लब पेर्सिजा जाकर्तासँग थप २ वर्षको सम्झौता गरेका छन्।
रोहित र पेर्सिजाबीच गत जनावरी १५ देखि लागु हुने गरी बुधबार २ वर्षको सम्झौता भएको हो।
रोहित एक साताअघि नै जाकर्ता पुगेका थिए। क्लबले सुरुमा छोटो समयका लागि सम्झौता गर्न प्रस्ताव गरे पनि उनले लामो सम्झौता हुनु पर्ने बताएका थिए।
पेर्सिजा र रोहितबीच भएको सम्झौता रकम नखुलाइए पनि गत वर्ष भन्दा तलब बृद्धि भएको छ। गत वर्ष उनी मासिक करिब १० लाख रुपैयाँ (झण्डै ९ हजार अमेरिकी डलर) पेर्सिजामा आबद्ध भएका थिए।
रोहितले गत सिजनमा ३७ खेल खेलका थिए। उनले २ गोल गर्दा २ पास गोलका लागि दिएका थिए। रोहित सन् २०१७ देखि पेर्सिजामा आबद्ध छन्। नयाँ सम्झौतासँगै उनी २०२२ को जनावरीसम्म पेर्सिजामा रहनेछन्।
पेर्सिजाले २०१८ को इन्डोनेसिया लिग वान पनि जित्न सफल भएको थियो। पेर्सिजनाको उपाधिमा रोहितको भूमिका उत्कृष्ट रहेको थियो। जसकारण उनले २०१८ लिग-१ को सर्वोत्कृष्ट खेलाडीको उपाधि समेत जिते।
रोहितले यसअघि सन् २०१३ देखि २०१५ सम्म पेर्सिजाबाटै खेलेका थिए। २०१६ को सिजन गुमाएका रोहित २०१७ फेरि पेर्सिजामा आबद्ध भएका थिए।
एन्फा एकेडेमिका उत्पादन रोहितले सन् २००९ मा व्यवसायिक फुटबल खेल्न सुरु गरेका थिए।
मच्छिन्द्र क्लबमा आवद्ध भएर करिअर सुरु गरेका उनी पहिलो सिजनमै उत्कृष्ट डिफेन्डर घोषित भए। मच्छिन्द्र त्यो सिजनमा ब्रिटिश गोर्खा कपको सेमिफाइनल सम्म पनि पुगेको थियो। मच्छिन्द्रमा मासिक १ लाख ५० हजार रुपैयाँमा आबद्ध रोहित सर्वाधिक पारिश्रमिक पाउने नेपाली फुटबलरका भएका थिए।
रोहित सन् २०१० मा भारतीय क्लब हिन्दुस्तान एरोनोटिक्स् लिमिटेड एससीमा अनुबन्धित भए। क्लबले रोहितलाई मासिक १ लाख २८ हजार रूपैयाँमा अनुबन्ध गरेको थियो।
२०१२ मा रोहित इन्डोनेसिया पुगे। त्यतिबेला उनले एफसी पेकन्बरूमा सम्झौता गरेका थिए। एक सिजन इन्डोनेसियामा खेलेपछि उनी एफसी भेस्ट्स्जेल्याण्डमा आबद्ध भए। त्यहाँ ६ महिना बिताएपछि रोहित इन्डोनेसियाको पेर्सिजा जार्कतामा आवद्ध भएका थिए।
२ सिजन जार्कतामा बिताएपछि रोहितले सन् २०१५ मा मलेसियन क्लब टि–टिम एफसी र २०१६ मा मनाङ मस्याङ्दी क्लबबाट खेले।
नेपाली राष्ट्रिय टिममा सन् २००९ मा डेब्यू गरेका उनले अहिलेसम्म ६० अन्तर्राष्ट्रिय क्याप जितिसकेका छन्।