नागरिक उड्यान प्राधिकरण सिमरा बाराले रात्रि उडानको सम्पूर्ण तयारी पूरा गरेर पनि सञ्चालनमा ल्याउन सकेको छैन।
करिब २५ करोडको लागतमा धावनमार्गको विस्तारसँगै लाइटिङ, फायरफाइटिङ जस्ता पूर्वाधारको निर्माण सम्पन्न गरेको एक वर्ष बितिसक्दा पनि विद्युत् आपूर्तिको व्यवस्था गर्न नसक्दा रात्रि उडान सञ्चालनमा नआएको हो।
विद्युत् प्राधिकरणलाई डेडिकेटेड फिडर (२४ घन्टे विद्युत् आपूर्ति) का लागि बारम्बार अनुरोध गर्दा पनि बेवास्था गरेका कारण रात्रि उडान सञ्चालनमा आउन नसकेको नागरिक उ•यन प्राधिकरण कार्यालय सिमराका निमित्तप्रमुख सुरज बिशङ्ख्यले बताए ।
राजधानी काठमाडौसँग जोडिने सबैभन्दा छोटो दूरीको विमानस्थल भएकाले नियमित उडानको साथै आपतकालीन अवतरण र अन्तर्राष्ट्रिय उडानका चार हवाई मार्ग भएर आउने जहाजहरुलाई समेत सिमरास्थित 'डिभिओआर डिएमई'को सङ्केत आवश्यक हुने हुँदा २४ घन्टे विद्युत् आपूर्तिको आवश्यकता भएको बिशङ्ख्यले बताए ।
बारा, पर्सा, रौतहट, मकवानपुर र सर्लाही जिल्लाको केन्द्रविन्दुको रुपमा रहेको यो विमानस्थलबाट भारतीय पर्यटक, आद्योगिक कोरिडोरका उद्योगपति एवम् राजनीतिज्ञ र यस भेकका सर्वसाधारणले सेवा लिँदै आएका छन्।
जेटस्टिम ४१, एटिआर ४२ बिचक्रयाफ्ट जस्ता जाहाजहरुले यस विमानस्थलमा उडान भर्न सक्ने भए तापनि हाल बुद्ध एयरको बिचक्राफ्टले दैनिक सात र सिमि्रकले दुई नियमित उडान भर्दै आएको छ।
गत अर्थिक वर्षमा यहाँबाट दुई हजार ३०४ उडानमा ३५ हजार १४३ यात्रुले उडान भरेका थिए भने ३४ हजार ९५७ यात्रुले अवतरण गरेको प्रधिकरणको तथ्याङ्कमा उल्लेख छ। हरेक विमानस्थल आफैँमा सुविधा सम्पन्न हुनुपर्ने आवश्यकता सँगै पछिल्लो समयमा मानव जीवनमा आएको परिवर्तन र व्यस्तताले पनि रात्रि उडानको आवश्यकता महसुस भएको छ। रासस
